Galerie

2018

Träumeler-Ball, Mittwoch vor Schmu-Do – 07.02.2018

Z'Äbike hemmer grockt! E glongne Uftakt id Fasnacht 2018! 

Schmu-Do – 08.02.2018

S'Märemonschter in Sämpach esch emmer es Highlight för üs Bäribrommer. Leider esch ide Höufti vom Obe d'Kamera kapott gange, d'Böudli-Uswahl esch aso beschränkt. 😉

Am Nomitag semmer im Chenderhuus ond im Altersheim in Sämpach go Ständli spele.

Fasnachts-Friitig – 09.02.2018

Nochem alljöhrleche Ständli bim Willi Beck ond de feine Schenkegepfeli hemmer üs före Fototermin parat gstöut. Wie emmer hed das be üs ned of Aheb klappet, es esch aber trotzdem öppis schöns usecho. Noch de Chrone-Fasnacht (schlimmer geht immer) semmer of Hünebärg de Obig bede Cocoricos go gnüsse.

Fasnachts-Samschtig – 10.02.2018

Nocheme Ständli bim Restaurant Törmli semmer zäme of Hofdere. Nochem Ihzog hemmer no 3 wiiteri Uftrett gha. Trotz den Hin ond Här hend mer de Obe sehr chönne gnüsse ond ide grosse Halle esch zemli zelebriert worde. 

Fasnachts-Sonntag – 11.02.2018

De Sonntig hemmer im Nochebersdorf Höudisriede verbrocht. D'Schneeflocke send soooooo gross gsi. Nochem Omzog heds no öppe eis zwöi drü Tee-Zwätschge im Häxechessu gäh.

Fasnachts-Montag/Kinderfasnacht – 12.02.2018

Mäntig heisst för üs: Chenderfasnacht! S'Wätter esch super gsi, trotz em chalte Wend hed ab ond zue d'Sonne gschene. Noch de Chenderfasnacht semmer id Stadt Lozärn of de Rothusstäge go spele. D'Stemmig dete esch emmer weder super! 

Fasnachts-Dienstag – 13.02.2018

Der letzte Tag der Fasnacht! Noch de Taufi hemmer im Eden osse es Ständli gspöut ond deför es feins Znacht becho. De semmer metem Car ad Verrumete, womer wie letscht Johr us de Drink-Bächer vo üsem "Humor-Festival" en riiiiiiese Torm bouet hend. 

2016

2015

2014